• Video
• Image

ശബരിമല ദർശനത്തിനൊരുങ്ങുന്ന ക്രെെസ്തവ പുരോഹിതൻ റെവറൻ്റ് ഡോ. മനോജ് കെ ജിക്കെതിരെ സഭ നടപടി. മനോജ് ശബരിമല ദർശനം നടത്താൻ പോകുകയാണെന്ന വാർത്തകൾക്കു പിന്നാലെ ശുശ്രൂഷ ചെയ്യാനുള്ള ലൈസന്‍സും തിരിച്ചറിയല്‍ കാര്‍ഡും സഭ തിരിച്ചെടുത്തിരിക്കുകയാണ്. ഫാ: മനോജ് വിശ്വാസപ്രമാണങ്ങളുടെ ലംഘനം നടത്തിയെന്നാരോപിച്ചാണ് സഭ നടപടിയുമായി രംഗത്തെത്തിയിരിക്കുന്നത്. ശബരിമല യാത്രയ്ക്കായി വ്രതം നോൽക്കുന്ന ക്രെെസ്തവ  പുരോഹിതൻ്റെ വാർത്ത കേരളകൗമുദിയാണ് പുറത്തു കൊണ്ടുവന്നത്. വാർത്ത പുറത്തുവന്നതിനു പിന്നാലെയാണ് സഭ മനോജിനെതിരെ നടപടിയുമായി രംഗത്തെത്തിയത്. 

ആംഗ്ലിക്കന്‍ സഭയിലെ പുരോഹിതനായ ഫാദര്‍ മനോജ് കഴിഞ്ഞ ദിവസമാണ് ശബരിമല ദർശനം നടത്തുയാണെന്ന് പ്രഖ്യാപിച്ച് രംഗത്തെത്തിയത്. പ്രസ്തുത വാർത്ത വ്യാപകമായി ചർച്ചകൾക്ക് ഇടയാക്കിയിരുന്നു. ഇതിനു പിന്നാലെയാണ് മനോജിനെതിരെ നപടി പ്രഖ്യാപിച്ച് സഭ രംഗത്തെത്തിയത്. എന്നാൽ സഭയുടെ നടപടി അംഗീകരിക്കുന്നില്ലെന്നും ഇത് ആംഗ്ലിക്കൻ വിശ്വാസപ്രമാണങ്ങൾക്ക് എതിരാണെന്നും ആണ് ഫാ:  മനോജ് വാദിക്കുന്നത്. സഭ തനിക്കെതിരെ നടപടി സ്വീകരിച്ചിരിക്കുന്നത് പഴയ നിയമ പ്രമാണങ്ങളുടെ അടിസ്ഥാനത്തിലാണ്. എന്നാൽ ഈ പ്രമാണങ്ങൾ ക്രൈസ്തവ വിശ്വാസത്തിൽ നിന്നും നീക്കം ചെയ്യപ്പെട്ടവയാണ്. അതുകൊണ്ടുതന്നെ സഭയുടെ ഈ നടപടി അംഗീകരിക്കുന്നില്ലെന്നും ഫാ:  മനോജ് വ്യക്തമാക്കി. 

എന്തൊക്കെ സംഭവിച്ചാലും താൻ ശബരിമല ദർശനം നടത്തുന്ന നടപടിയിൽ നിന്നും പിന്മാറില്ലെന്നും മനോജ് പറഞ്ഞു. ബൈബിളിൽ രണ്ടു നിയമങ്ങളുണ്ട്. പഴയ നിയമവും പുതിയ നിയമവും. പഴയ നിയമം കൊണ്ടുവന്നത് മോസസ് ആണ്. പഴയ നിയമത്തിലെ പല വ്യവസ്ഥകളെയും യേശുക്രിസ്തു അവതരിച്ച ശേഷം നീക്കം ചെയ്യപ്പെടുകയും ക്രിസ്തു പുതിയ നിയമങ്ങൾ കൊണ്ടുവരികയും ചെയ്തു. പ്രസ്തുത നിയമങ്ങളുടെ സംഹിതയാണ് ഇന്നത്തെ ബൈബിൾ പുതിയ നിയമ പുസ്തകം. എന്നാൽ കർത്താവ് നീക്കിയ പഴയ നിയമസംഹിതയുടെ അടിസ്ഥാനത്തിലാണ് തനിക്കെതിരെ ഇപ്പോൾ സഭ നടപടി എടുത്തിരിക്കുന്നത്. അതുകൊണ്ടുതന്നെ ഈ നടപടി നിലനിൽക്കില്ലെന്ന് ഫാ:  മനോജ് ചൂണ്ടിക്കാട്ടുന്നു. 

ആംഗ്ളിക്കൻ പുരോഹിതനായ ഫാ: ഡോ. മനോജ് 41 ദിവസത്തെ വ്രതമെടുത്താണ് ശബരിമലയിലേക്ക് പോകുന്നത്. ഈ മാസം 20നാണ് അദ്ദേഹം മലകയറാൻ തീരുമാനിച്ചിരിക്കുന്നത്. കെട്ടുകെട്ടി ആചാരങ്ങളെല്ലാം പാലിച്ചാകും മലകയറ്റമെന്നും മനോജ് വ്യക്തമാക്കി. ശബരിമല പോകാനായി വ്രഗതം ആരംഭിച്ചു കഴിഞ്ഞു. 41 ദിവസത്തെ വ്രതം പൂർത്തിയാകുന്ന 20ന് തിരുമല മഹാദേവ ക്ഷേത്രത്തിൽ വച്ച് കെട്ടുനിറ നടക്കും. ഹിന്ദു മതത്തേയും ആചാരങ്ങളേയും അടുത്തറിയകയും അവയെക്കുറിച്ച് കൂടുതൽ പഠിക്കുകയുമാണ് തൻ്റെ ലക്ഷ്യമെന്നും മനോജ് പറയുന്നു. ഒപ്പം മറ്റ് മതങ്ങളെയും പഠിക്കും. ഇതിനായി സ്വന്തം മതത്തെ ഉപേക്ഷിക്കേണ്ട കാര്യമില്ലെന്നാണ് അദ്ദേഹം പറയുന്നത്. തിരുവനന്തപുരം, ബാലരാമപുരം ഉച്ചക്കട പയറ്റുവിള സ്വദേശിയായ ഫാ. മനോജിൻ്റെ നടപടി വലിയ പ്രതിഫലനങ്ങൾ ഉണ്ടാക്കുമെന്നാണ് കരുതപ്പെടുന്നത്.